Ne Win tupa Aye Ne Win in Pope vekin thuamaw in hnisuak capoh ih a tuahmi soisel a hlawh

Shwe Ein Si ih suahcam ah Laltahrawt Ne Win ih tupa Aye Ne Win in Pope angki vek sin in a thuamaw ih mi then khat an lu parah kutsuang in thlawsuah pe vek ih a cangvaimi parah mipi ih soisel a hlawh nasa.

    Hivek ih a thuamawk hi November thla ah Pope Frencis Myanmar a ra tlawn ding thawn a naihawk tlun tu laifang sakhua thu ah Myanmar ram ah an sa hiaihiai laifang a si tikah Buddist sakhua zumtu pawl khal in an soisel.
    Shwe Ein Si hi Rohingya Bangali thu ah hate speech a sim ruangah Miss lukhuh a ngahmi khal an lawng sal ih kan dung zarhte sun Sule kiang ralkap tanpinak lamzawhnak khal ah a tel vemi a si. Cun anih hi Aye Ne Win thawn thlun aw ringringmi an si.
    “Midang sakhua biaknak hi hnihsuak sainak ah kan hman ih kan nuamawk vek in kan biakmi sakhua khal hnihsuak capoh ih an hman tikah pacang tak in kan cahlang thei maw?” tiah Moe Thwe in a facebook cahmai ah a ngan.

Cun canganthiam, thuthang latu U Myit Khaing in “Gusto Bar ih New Zeland fa kha Buddha zuk lemah ear phone a bunter ruangah Myanmar ah thawnginn a to. Cun Rebel Riot Punk band le Thai awnmawi thiam mino pawl in sakhua tin remdaihnak ah tin Punk style thawn phungki puan sin in thla an zuk ruangah thawng an tla lo fangfang. Mah-Bah-Tah pawl nasa te’n ngaidam an dil hngehnge. Saya Htin Lin Oo in Mah-Bah-Tah a soisel ruangah thlawng a tla. Sakhua hi hnihsuak capoh ih tuah a theih ko. Pakhat a tulmi cu ‘rualrannak’ si. Sakhua pakhat soisel theih a sile a dang sakhua khal soisel a theih dingmi si” tiah a ti.
Himi zuk hi U Myat Khine in a facebook ah October ni 30 zaan sim hnu ih a run tarmi a si.