Falam khawpi kauh ruangih Laizo khua buainak parah mipi hmuhdan

Falam town plan sung ih Laizo veng

Salai Lal Nun Uk
Falam khawpi ah thil tha um thluh sehla kan duh cio ding. Tu ai a thangso ding tla cu zo khal ih Amen kan ti cia thluh ding ah ngai cia a theih ding. Sinan a taktak ah Falam khawpi thansonak lamzin hi a tluang zuahzo dah lo. Pu Za Hre Lian in Falam khawpi kauh ding in an tawlrel ih Tlaisun khua in kan bazar kainak a hla ding tin an rak duh lo. Cun Laizo in an lothlawhnak bik hmunram an tuan thei nawn lo ding ruangah an rak duh lo. Curuangah Cozah a hung thlengawk thawn an pehzulh thei nawn lo. Tu khalah Falam khawpi veng (4) an kauhbet sungah Laizo khuakom khua (7) cu thiatbal in Falam khawpi Laizo veng tiih Paydaungsuh hluttaw in October ni 23 sun thu an relcat. Asinan Laizo khua pawl in an lungkim lo ih a thaisun October ni 24 ah duhphorhnak tuah ding in Falam peng palik zungah an dil cih. Hi thu ah leitlun khawza kip ih um Falam mi le sa pawl ih hmuhdan bangawk lonak tete a um. Hmuhdan le ruahdan bangawk lo ruangah hmelma vek ih ruah ding tla si lo ih midang ruahnak upat thiam hi mi pitling lungput a si sawn.

Salai Kae Tin (USA)

Kom ding lungkim thei sehla Falampi a cak sinsin ding. Falam le Laizo an then aw kel lo. Dung hmai khal a um lo, rual te’n an feh tlang. Laizo pa nih Laizo tong a hmang sung cu Laizo tong a hlo lo tin ka pom. Leiram nei lo timi ahcun tu Chin state ih leilung hi Kawl acozah ih ta a si. Kawl cozah kut tang ih kan um sung hi cu lei man siah in dil le pek tul ih leiram in lak sak le kaa cip ih pek tul dinhmun kan si. Laizo in hivek ih an ruah hi khua le ram a duhdawt tuk ruangih a suakmi ruahnak si in ka hmu.

Mai Sui Ngun Par@ Sui Kuk(Falam)

Laizo cu ram neitu an si ruangah pipu ram an hum duh thu a si sawn ding ka zum. Tong le hnam hlo le hlo lo cu bulpak cio ih tuanvo a si ih anmah khal in thupi bik ah an retmi a si ding ka zum lo. Falam khuasung lamzin kauh dingah hman innhmun pi 1 pi 2 te hman a siang lo tla an um, kan um kan thei awk ko si. Khatlam ah theithiam sak ding an si ve. An duhnak langter teh a poi maw si. Mi zo cio in duhnak langter ding right kan nei cio ko si. Cule unau Laizo khuami pawl khal in Falam khuapi thansonak dawnkham ding tiang cu an tum lo ding ka zum.

Salai Vum Za Piang@Salai PP(Yangon)

Leiram hi tili vek a si ih miphun le tong, calai, nunphung hi tiluang vek an si. Tili neitu hi a thlengaw thei vek in, a thlengaw reromi miphu, tong, calai le nunphung sinsin tla cu a riavai vivo thei tuk. Falam timi hmin kengtertu cu Tlaisun an si ih Falam tong a hrambunnak cu Laizo tong a si. Falam kan thupitter ding asile thlah le pek tulmi a um theu. Hrinhnam dang khal in an pek tulmi a um thotho. Amah lawngte diriam ko in ruahrel zawi-awk ding a thupi. Laizo khal hnget seh, Falam khal kau seh timi policy in feh a tha bik.

Sen Hre Thang(Laizo)

Town plan lai ah thu pali kan dil. Cumi in ruahrelpi lo le Town plan tonkhawnak ah kannih kan tel lo, mipi thawn kan ruat sal leh ta ding tin kan sim. Vei khat hman kan lungkim tinak a um lo zia a fiang. Kan pupa ramhual sungih a ummi inntek kha mikhual in town plan lenglam ah tlan uh in ti theinak a um lo. Kan pupa ramhual thu ah ram neitu in zo hman tawhhrim kan tum lo. Khawnu khawpa in kan ram parah thu an nei fawn lo. Bulpak le pawlkom hmin in kan tawhhrimmi a um lo. Kan theih lo ih kan ramthu tlun lam thlengtu lawng mawhphurhnak kan nei ter duh.

Pi Levi Sap Nei Thang(USA)

Falam khua thangso kan dung zet. Sinan a thangso ding dawnkhamnak thu a um ahcun hmai kan sawn thei zik lo. Cozah lam ihsin an ruahnak a tha ka ti. Laizo khua a dang te’n um an duh asilen town plan area ihsin an thawn suak a tha ti’n ka hmu ve.

Pastor Van Bawi Lian(Baila khua)

Laizo lamah siseh, town plan tuanvo neitu lam ah siseh hruaitu felfai an um lo. Cozah lam in hi thu ah tha te’n thurel tlangnak hi an nei mal tikah duhthu a saam lo. Cun cozah le Laizo khua pawl an biak remaw thei lomi kha zatlang pawlkom ih va relrempitu pawlkom Falam a mal. Cun Laizo khal in land right an nei ve. Mangbang za si mi cu Laizo in kan lungkim lo an ti ringring mi kha neta lam ah kan lungkim sal tiah anmah theih lo in ca an tuahmi hi zawi timi ha a si. Curuangih duhphorhnak tuah tum khal an si ih duhphorhnak an tuah taktak khal ah Laizo hrang khal ah siseh, Falam khawpi hrangah siseh thathnemnak a um tuk lo ding. Town plan khal an tlai ter phah thei.

Salai Napoleon(Singapore)

Ka mang a bang deuh. Falam khawpi hi Falammi zate ta a si, ti’n ruat thei cio sehla a tha zet ding. Hrinhnam hi khaw pakhat menih hrambun a silo tikah komawk men ih hloral thei a si lo. Lungkim thei sehla zate hrangah a thabik ding, ti’n ka ruat.