Ralkap in Kalaymyo ih Seven Day biakinn hmunram lon an tum

Kalaymyo Chanmyitaungsi veng ih Seven Day biakinn hmunram le a sehvel inn (17) cu khah.lah.ya (228) ralkap in kan ta tiah lon an tum thu theih a si.

Himi hmunram hi 1987 kum ah hmun neitu Pu Gin Khan En in Pinlong Seven Day kawhhran hnenah a rak hlumi a si ih 1990 kum ah ralkap in an hmunram kauh dingmi area ah a tel ti’n an sim. Sinan 1997 ah ralkap in pengpi zungah an ap sal zomi a si.

“Thuthennak zung in kawhnak ca an lo pek le cutawk ah simfiang aw leh uh tiah an kaa in mi zaan sun ah in ra sim. Kannih cun zunglam ah kan hek tum lo, thuthennak zung in in kawh le thuhla kan va simfiang men ding” tiah MUC(Myanmar Union Conference of Seventh-day Adventists) sungtuan Pu Thang Za Pau in a sim.

Kawhhran in pungsan(105/106) an nei ih biakinn area a kauhlam hi pi 200x120 a si. 1990 kum ah ralkap in innhmun lon ding ih an tummi hi eka 0.30 si nan tu ih tu ah ralkap ih an lon sal tummi hi eka 2 tluk a kau. Pinlong Seven Day biakinn umnak hi Saihkanta lamzin le Pinlong Lanmadaw lamzin kil ah a si.