Rock awnmawi le fashion thawn Mino hmuitin in Pathian rong ka bawl thlang ding: Solomon Khrih Menrihai

Rock siangpahrang Solomon Khrih Menrihai cu tu ihsin thok Rock awnmawi le Rock fashion thawn Pathian rong ka bawl thlang ding tiah a ti.

September ni 11 hi a suahcam ni a si ih hi ni in thuthluknak a tuahmi a si. Sinfen a kendan ding cu tu lai mino pawl vek in zangkhai te’n samsau in a ret tum. Asinan ahlan vek in mitkil suai, luruh, hnakhaih tivek a ken tum lo thu a sim.

“Hitin ka tuahnak cu Pathian thu nun pi hrih lo pawl hrang thuthang tha ka phuang thei dan ding a si. Tulai mino tete sinfen kendan vekih um le mi an biak ngam ih thusimmi tla a lut sawn. Zovek minung ziangvek fashion khal in cohlang theitu Pathian zangfahnak ih rundam kan si kha kan Amen thluh a tul ko. Khrih rundamnak ah ri kan khiah tuk hi a poi” tiah zaithiam Solomon Khrih Menrihai in a sim.

A hla pawl hi biakinn sung sak dingah cun a ngaitu hrang a hak deuh ruangah crusade singer ding cun a harsat thu, Gospel concert lam ih a feh tum thu a simbet.

“Kum (3) sung ka hla thawn kaih lonak crusade le camping le conference ti pawl ah rongbawl in ka feh. Vei khat tla cu upa pakhat in na hla an hak tuk, a dang sak tum aw in ti dah” tiah Solomon Khrih Menrihai in a tontehmi a sim.

Noverber le December thla khal ah Tahan le Falam khawpi ah Khrih Menrihai group in Gospel concert a nei ding. Cun tu ah Gospel Rock hla thar album a suah tum rero ih hla ngantu pawl cu Lai mi Rock hla phuah thiam Salai Rajiv le Salai John LsL an si.