Salai San Uk Hnin ih “Hrap Khat lungkuai” timi hlathar a suak cing ding

Hlasaktu Salai San Uk Hnin

Salai San Uk Hnin ih album pahnihnak “Hrap Khat Lungkuai” hlathar cu November thla thar ah an zemdarh thok ding tiah thuthang kan ngah.
Hlasaktu hi ahlan ah “Tuu le Me thenawknak” timi Pathian thangthatnak hla album a rak suah zo ih a hla cu mipi kaa ah tu ni tiang a cam ringring lai.
“Duhdawtnak hlasak hi a sualnak um in ka hmu lo ih cunah si ka sak. Minung cu mah le ruahdan cio a si ko ih cun thiamzung timi cu soisel le fak ruangih danglam thei a si lo tiin ka ruat. Himi hla pawl hmangin Chin awnmawi khawvel ah mai’ tappi tong te rori ih duhdawtnak hlasak ding kan neih bet ding le kan awnmawi dinhmun khal karbak pakhat te tal thansohnak thlentu a si thei beiseinak thawn man lo cing in theitawp suah ih ka zuam venak san a si. Ka upat le ka ngai thupi bikmi cu ka hla in ngaisaktu ding mipi pawl an si” tiah Salai San Uk Hnin in a sim.
Hla phuahtu pawl ah Thawng Bik, Baw Cung Lian, ACM, Zuunphir le Salai San Uk Hnin tla an si.

Hlaphel cover

Hla phun pawl cu Modern Rock, soft Rock, Pop style pawl an si. Hla thulu ah “Hrap Khat Lungkuai” ti’n a peknak thu ah Salai San Uk Hnin in “Kan duhdawtmi nih kan duhdawt zet cing in val dang leng dang tangah in tlansan tikah a tuartu le a tong dahtu cun a natzia le a hamkhaat zia hi kan theifiang cio ko ding ka zum. Cumi caanih tuarnak kha phorhsuak ka duh ruangah himi thulu hi ka hmannak san a si” tiah a sim bet.
Awnmawi tumtu pawl cu Guitar: Pi Pi, Bass: Ye Zaw Myo, Drums: Wai Phyo, KB, Mungpi pawl an si. A man cu pakhat ah 1,500 a si ih VCD in an zuar pei ih ramleng hrangah audio CD lawng an zuar ding.