Letpanchaung sehvel ah lo eka (300) lenglo fang a siat ih ramthen cozah hnenah dawm company an hek

Letpanchaung le a sehvel Laimi khua pawl in fangvui thatnak Top One dawm an hman ruangah lo eka (313.53) cu fang khawm ding um lo in an siat thluh ruangah ramthen cozah hnen ah dawm company in fang man kuan dingah November ni 6 sun ah ca an kuat.

Top One dawm thehmi fang (Zuk: JC facebook)

Top One dawm hmang ruangih lo a siatsuahmi pawl cu Haikhawl khua inn (30), Mauhlin khua inn (9), Aungzua khua inn(7), Letpanchaung khua inn(6), Zonuam khua inn (2), Tayakung, Pyidawta le Minhla khua cu inn khat fingfing an si.
Ramthen cozah tuanvo neitu pawl hnen ih an cakuatmi sungah “2017 fur fangcang vawi that duhah Shwe Naga company ih tuahmi Top One fangrah thatnak dawm kan lei ih kan hmang. Curuangah kan fang pawl a vui an suak thei lo, a vuimi tla an ro sal, a kung an eng tivek in an um. Hi thuhla kha Kalaymyo ih Shwe Naga company zung then ah phone in kan sim nan company thawn a pehpar aw lo ti lawng in in let ih tu tiang tuanvo an la duh hrih lo. Curuangah lothlo pawl kan sunralmi parah Shwe Naga company in lo eka pakhat ah fang tang (80) man thawn milaw in zaangna domnak in pek ding in le daan vek in cawhkuan ter ding ah in bawm uh” tiah an ngan.

Lothlo pawl an vorhmi Top One dawm(Zuk:JC)

Company lam cun fang nat a tla si ding tiah an let, hmansehla Top One dawm an hman lonak a kiangkap lo pawl cu na lo in tha te’n an vui thei ko tiah Right and Peace aiawh in lo a va haltu in Salai Jesse in a facebook ah a ngan.
“Hi hman hi Tuingo khuakom lam, Tayakung le Pyidawta khaw lam hi cazin kan ngah kim hrih lo ih cazin kim in la thluh thei sehla hi ai a tam lai ding” tiah cozah hnen ih ca kuat ding tawlrelpi tu Salai Htwe Aung in a sim.