Mandalay ah khualkhua ihsin ra dam lo pawl umnak ding Chin Center an sak tum

Salai Lal Nun Uk

Khualkhua ihsin dam lo ruangah Mandalay sizung ra pan pawl hrang umnak ding Chin Center cu hmai kum 2018 June thla in Falam Baptist Church, Mandalay(FBC,M) in an sak thok ding.

Himi Chin Center innpi hi pi 40*60 a kau ih Mandalay khawpi Aung Pin Ley veng ah an sak ding. Chin Center an sak tumnak san bik cu Laitlang in Mandalay ah a rami mina pawl siizung, siikhan an rat tikah camkhat umnak le cawlhnak hmun an harsa. Dam lo hrekkhat cu Kawl tong tha te’n an thiam lo ruangah an natnak direct in an sim thiam lo tikah a tullo in sumpai, tikcu, nihlawh an cem. Hivek harsatnak ihsin luat theinak dingah Health Care Mission timi thok in Chin Center an sak tumnak a si.

“Curuangah hmai lam ah mina pawl famkim te’n kan zohkhen ih kan tuamhlawm theinak dingah Chin Center ah full-time in sibawi, nurse le zung hnatuan pawl kan ret sak tum” tiah FBC,M pastor Rev.Thian Lian Sang in a sim.

Center saknak dingah ting thawng hnih cem ding an hisap ih tu ah ting 300 lawng an kut sungah a um. Innpi an sak theh hlan ah mina riak theinak dingah dot khatnak le dot hnihnak cu zanmrang te’n sak an tum.

“Tuni tiang cu kanmah te’n Faith promese tivek in sum kan khong aw. Tu nai te ah LBA zungah kan lengih LBA ramsung ih fund hawl theinak kan dil. Neta cu FBA ramsung le ramleng ih um kan Chinmi pawl hnenah bomnak dil kan tum” tiah FBC,M pastor Rev.Thian Lian Sang in a sim.

FBC,M hi 1999 kum ah an rak ding thok ih tu ah inn thawng 38 an um ih biakinn an neih hrih lo ruangah Myanmar Theological College (MTC) Baibal tlawng ah an pumkhaw aw. Tui’ Center innpi an saktumnak khi biakinn hmunram dingih an rak leimi a si. Center innpi saknak hrang sumpai hlu duh hrang ah phone 09-258881844, 09-452555581 le email: fbc.mandalay@gmail.com, aaronsang.flm@gmail.com ah pehtlaih a theih.