Mandalay Chin Kumthar Puai ah CM Salai Lian Luai telpi ding

Salai Lal Nun Uk

Falam Pawlpi, Mandalay in October ni 5 ih an tuah dingmi Chin Kumthar Puai ah Chin ramkulh CM Salai Lian Luai in a telpi ding tiah thuthang kan ngah.

“In telpi thei le thusimnak tla a nei ding. Ahlan ihsin FP,M ih hnatuan kaih nei ringring a sisi. Cun Falam mi Mandalay ih rung tlawng remcang an um le kan puai in hmanpi kan duh zet” tiah Falam Pawlpi, Mandalay ih Vice President Salai Mawng Hlan in a sim.

Chin Kumthar Puai an hmannak ding cu lamzin 56, 38*39 tek ih Chaing Sii hotel ah a si ding. Mandalay ah Falam mi le sa hi inn 150 hrawng an um ih Chin kumthar puai ah minung 350 hrawng an suak khawm thei.

Cun himi ni thotho ah Yangon ih Falam Pawlpi hohanak in MBC hall ah Chin Kumthar puai an tuah ding. Himi puai densen in bawhlung le Arhmul thawi zuamawknak an tuah.