Falam khawpi sung veng pakhat si an duh lo ruangah Laizo khua in Falam ah November ni 1 ah duhphorhnak nei ding in Falam peng palik zungah ca an pe.
October ni 23 sun ah Pyidangsuh Hluttaw in Laizo khua cu Falam khawpi ih veng si seh tiah an nemhnget.
“Laizo hi hrin khat kan si tikah veng ih kan can cun midang tla an ra um ve pei ih kan rawi aw kei kan tong a hlo thluh leh ding. Cun hrin pakhat in ram a nei lo ding hi thilcang thei si lo. Ziangah tile tu hi kan khuakom kha an thiat bal zo tikah daan ahcun a naibik khuakom in ram a run a co ding ti’n a um. Curuangih khuakom in pe uh tin duhphorhnak tuah kan tumnak si” tiah Laizoram kilkhawtu committee hotu Pu Za Thang in a sim.
Falam veng ih tel an duh lo thu cu Chin ram CM Salai Lian Luai hnen ah siseh, rampi president hnen khal ah ahlan in ca an kuat rero zo tiah a simbet.
Himi duhphorh ding thu ah Falam khawnu khawpa in an lungkim lo thu Falam peng uk zungah October ni 24 ah ca an kuat ve.
“Falam khua kauh ding thu hi Falam khawnu khawpa hohanak in a kiangkap ih khua pawl reltlang hnu lungkimnak thawn tuahmi a si. Tu ah Laizo khua pakhat lawng in an lungkim lo thu duhphorhnak an tuah tummi hi mi depde pawl tawtoknak a si tin kan zum. Curuangah Falam khawnu khawpa cun kan lungkim pi lo a si” tiah ca sungah an ngan.
Town plan hi 2012-2013 kum ah an suai ih 2014 kum October lawngah mipi in hmuh tiah Pu Za Thang in a simbet. Laizo khua thar an kainak hi Falam town plan sung ih um a si ih tu ah inn (60) lenglo in inn an sak zo.
Falam peng Sipin hotu Pu Dar Lian Uk in “duhphorhnak an tuahmi in town plan le Laizo hrang ziang thathnemnak a um ding? Cozah le hluttaw ih rem timi hi Pathian in rem a timi si ko ding tin ka ruat. Zapi pommi tha ti sehla thlawsuah um sawn ding. Falam le Lai tong neitubik an si ih Falam nu le pa dinhmun ding ding sawn an si nan” tiah a sim.
Duhphorhnak ih an fehnak ding lamzin cu Falam laansone in an hngak aw pei ih pengpi uknak zung, distric uknak zung hmai pawl an feh pei ih cutin laansone ah an kir sal ding. Lamzawhnak ih tel ding ih mipum an pek zat cu minung 80 a si.
0 comments:
Post a Comment