Ramdang ah Caw, Naa tawl an siang zo

Ramdang ah Caw, Naa a nung lai ih tawl an siang zo thu October ni 9 ni ah sumdawnnak le pursumnak tlangbawi zunghrampi in ca a suah.

Ramdang ih Caw, Naa pawl zuar ding tikah caw, naa leikhawl, rannung harhdamnak cek, ramsung ramri kaan ih caw hruai tikah sumdawnnak le pursumnak tlangbawi zung hrampi, Cinthlak Vulhzuat le tikhuah tlangbawi zunghrampi, Vulhzuat le kilkhawinak zung ih tidan le daan tuahmi pawl thlun ding a si tin an tarlang.

Tubang ih ramdang ah Caw, Naa zuar an siannak cu rampi ih hman reromi sumdawnnak kalhmang thawn mil in a lei duhtu le a zuartu karlak ih tulsamnak vek in daan lo ih an rak zuarmi kha daan vek ih zuar thei dingah, vulhzuat pawl sumlut an ngah tam theinak ding le hnatuan a ser tam theinak dingah le lothlo pawl hlawknak humhim theinak ding ruahsan in ramdang ih zuar kan siannak a si tin an ngan.

Hi hlan ah ramdang ah Caw le Naa tawl an sian lonak cu ramsungah leilettu an um nawn lo pang ding ti a si nan hramlak lamzin in ramleng ah a phunphun in an zuar thotho.

Cun October thla khal ah Falam sakhung ih that ding Naa rual cu Pamuanchaung khua in an hun hruai lai an kai ih tu tiang Falam thawng inn ah an um lai.