Tui’ kum le hmai kum thlatang hi La Nina(pangai ai dai ce) a thlen theinak zatek 65 a si zo tiah nikhua tah thiam Dr. Tun Lwin in a ti. Kalay le Laitlang lam ahcun October ni 24 zing in thlatang rim a nam zet thlang tin facebook ih rualpi pawl in an run ngan rero.
La Nina ziang tin a cang?La Nina season a thoknak hi Pacific tifinriat sung hmun li hminsinmi sungah tifinriat tidai hi -0.5 degreeC ai niam ih a daih a tul. October ni 23 sun an tahnak ah hi hmun li ah hmun thum hi -0.5degree C ai a mal sawn ruangah La Nina a thlentheinak chance hi zatek a tam sawn zo.
La Nina a thlen le ziang a cang ding?
La Nina a ra thlen le December thla ah a daibik ding ih 2018 April le May tiang a dai ding. La Nina hi phunthum in a um. La Nina thamal, awmang tawk ih cak, le tha cak tin a um ih La Nina a rat ngaingai ih a tha mal lole awmang tawk ih cak a si ahcun tui’ a umnak hi Myanmar thawn a hlatawk zet ruangah kan thei tham lo men ding. Sinan a tha a cak ahcun tui’ kum thlatang hi a dai cuang ding, boruak a hnawng ding. Cun ruah a sur tam ding. Cutik ah 2018 fur ah thil tihnung pahnih a thleng thei. Ruah a tam kei ti a lian ding. Thlisia a hrang thei tiah Dr. Tun Lwin in a ti.
La Nina season a thlen kum piang thlisia a hrang theu. 1975 kum le 2008 kum hi La Nina season a luh ruangah tifinriat kaa pawl ah thlisia a lut ti kan hmu thei.
0 comments:
Post a Comment